ಹೈಲೈಟ್ಸ್‌:
- ಯುರೋಪ್‌ನ ಬಹುತೇಕ ದೇಶಗಳಲ್ಲಿ ಕೋವಿಡ್ ಪ್ರಕರಣಗಳಲ್ಲಿ ಭಾರಿ ಹೆಚ್ಚಳ
- ಫ್ರಾನ್ಸ್‌ನಲ್ಲಿ 1.79 ಲಕ್ಷ, ಬ್ರಿಟನ್‌ನಲ್ಲಿ 1.17 ಲಕ್ಷ ಕೋವಿಡ್ ಪ್ರಕರಣಗಳು ದಾಖಲು
- ಇನ್ನೊಂದು ವಾರದಲ್ಲಿ ದಿನವೊಂದಕ್ಕೆ ಎರಡೂವರೆ ಲಕ್ಷ ಕೇಸ್‌ಗಳು ದಾಖಲಾಗಲಿವೆ
- ಲಂಡನ್, ಪ್ಯಾರಿಸ್, ಬರ್ಲಿನ್ ನಗರಗಳಲ್ಲಿ ಹೊಸ ವರ್ಷ ಸಂಭ್ರಮಾಚರಣೆ ಇಲ್ಲ
ಯುರೋಪ್‌ನ ಬಹುತೇಕ ಕಡೆ ಓಮಿಕ್ರಾನ್ ವ್ಯಾಪಿಸಿದೆ. ಕ್ರಿಸ್‌ಮಸ್ ಪ್ರಯುಕ್ತ ಜನರು ಸಂಭ್ರಮಾಚರಣೆಗಳಿಗಾಗಿ ಜತೆಗೂಡಿದ್ದರಿಂದ ಕಳೆದ ಒಂದು ವಾರದ ಅವಧಿಯಲ್ಲಿ ಸೋಂಕು ಮತ್ತಷ್ಟು ಹರಡಿದೆ. ಇದಕ್ಕೆ ಮುಖ್ಯ ಕಾರಣ ಅಧಿಕ ಪ್ರಸರಣ ಸಾಮರ್ಥ್ಯದ ಓಮಿಕ್ರಾನ್ ಎಂದು ಹೇಳಲಾಗಿದೆ.
ಓಮಿಕ್ರಾನ್ ಆರ್ಭಟದ ಪರಿಣಾಮ: ಸತತ ಎರಡು ದಿನ 10 ಲಕ್ಷಕ್ಕೂ ಅಧಿಕ ಕೋವಿಡ್ ಕೇಸ್ ಕಂಡ ಜಗತ್ತು!
ಫ್ರಾನ್ಸ್‌ನಲ್ಲಿ ಕಳೆದ 24 ಗಂಟೆಗಳಲ್ಲಿ 1,79,807 ಕೋವಿಡ್ ಪ್ರಕರಣಗಳು ಪತ್ತೆಯಾಗಿವೆ. ಯುರೋಪ್‌ನ ಸೋಂಕಿತರಲ್ಲಿ ಆಸ್ಪತ್ರೆಗೆ ದಾಖಲಾಗುವ ಅವಶ್ಯಕತೆ ಶೇ 30 ರಿಂದ ಶೇ 70ರಷ್ಟು ಕಡಿಮೆ ಇದೆ. ಓಮಿಕ್ರಾನ್ ತಳಿಯು ಡೆಲ್ಟಾದಷ್ಟು ಅಪಾಯಕಾರಿಯಲ್ಲದ ಕಾರಣ ಪ್ರಕರಣಗಳ ಸಂಖ್ಯೆ ಹೆಚ್ಚಿದ್ದರೂ ಗಾಬರಿಪಡುವ ಸನ್ನಿವೇಶ ಉಂಟಾಗಿಲ್ಲ. ಆದರೆ ಯುರೋಪ್‌ನಾದ್ಯಂತ ಪ್ರಕರಣಗಳಲ್ಲಿ ಏರಿಕೆಯಾಗಿರುವುದು, ಆರೋಗ್ಯ ವ್ಯವಸ್ಥೆಯ ತೀವ್ರ ಕುಸಿತಕ್ಕೆ ಕಾರಣವಾಗಬಹುದು ಎಂದು ವಿಶ್ವ ಆರೋಗ್ಯ ಸಂಸ್ಥೆ ಎಚ್ಚರಿಕೆ ನೀಡಿದೆ.
ಮಂಗಳವಾರ ಪ್ರಕಟವಾಗಿರುವ ಡಬ್ಲ್ಯೂಎಚ್‌ಒದ ವಾರದ ಕೋವಿಡ್ ವರದಿ ಪ್ರಕಾರ, ಡಿಸೆಂಬರ್ 26ಕ್ಕೂ ಹಿಂದಿನ ವಾರದಲ್ಲಿ ಯುರೋಪ್‌ನಲ್ಲಿ ಹೊಸ ಕೋವಿಡ್ ಸೋಂಕು ಶೇ 57ರಷ್ಟು ಹೆಚ್ಚಾಗಿದೆ. ಅಮೆರಿಕದಲ್ಲಿ ಶೇ 30ರಷ್ಟು ಏರಿಕೆಯಾಗಿದೆ.
ದಾಖಲೆಯ ಪ್ರಕರಣಗಳು
ಸೋಮವಾರ ಫ್ರಾನ್ಸ್ ಆರೋಗ್ಯ ಸಚಿವ ಒಲಿವಿಯರ್ ವೆರಾನ್, ‘ಜನವರಿ ಆರಂಭದಿಂದ ಫ್ರಾನ್ಸ್ ಪ್ರತಿ ದಿನ 2.50 ಲಕ್ಷ ಕೋವಿಡ್ ಪ್ರಕರಣಗಳನ್ನು ಕಾಣುವ ಎಲ್ಲ ಸೂಚನೆಗಳೂ ಕಾಣಿಸುತ್ತಿವೆ’ ಎಂದು ಹೇಳಿದ್ದಾರೆ. ‘ಅತ್ಯಂತ ಕಷ್ಟಕರ ವಾರಗಳು ಮುಂದೆ ಬರಲಿವೆ’ ಎಂದು ಫ್ರೆಂಚ್ ಹಾಸ್ಪಿಟಲ್ ಫೆಡರೇಷನ್ ಹೇಳಿದೆ.
ಜನವರಿ ಆರಂಭದಿಂದ ವಾರದಲ್ಲಿ ಮೂರು ದಿನ ಕಡ್ಡಾಯ ವರ್ಕ್ ಫ್ರಂ ಹೋಂ ಸೇರಿದಂತೆ ವಿವಿಧ ಹೊಸ ನಿಯಂತ್ರಣ ಕ್ರಮಗಳನ್ನು ಫ್ರಾನ್ಸ್ ಪ್ರಧಾನಿ ಜೀನ್ ಕಾಸ್ಟೆಕ್ಸ್ ಪ್ರಕಟಿಸಿದ್ದರು. ಬೂಸ್ಟರ್ ಡೋಸ್ ನೀಡುವ ಪ್ರಕ್ರಿಯೆ ಕೂಡ ವೇಗವಾಗಿ ಸಾಗುತ್ತಿದೆ. 23 ಮಿಲಿಯನ್‌ಗೂ ಅಧಿಕ ಮಂದಿಗೆ ಬೂಸ್ಟರ್ ಡೋಸ್ ಕೊಡಲಾಗಿದೆ.
ಓಮಿಕ್ರಾನ್ ಭೀತಿ ನಡುವೆ ಕೊರೊನಾಕ್ಕೆ ಇನ್ನೂ ಮೂರು ಮದ್ದು!: ಎರಡು ಲಸಿಕೆ, ಮಾತ್ರೆಗೆ ಅನುಮೋದನೆ
ಇಟಲಿಯಲ್ಲಿ 78,000 ಹೊಸ ಪ್ರಕರಣಗಳು ದಾಖಲಾಗಿದ್ದು, ಸಾಂಕ್ರಾಮಿಕ ಆರಂಭದಿಂದ ಹೊಸ ದಾಖಲೆಯಾಗಿದೆ. ಅಲ್ಲಿ 202 ಸಾವುಗಳು ಸಂಭವಿಸಿವೆ. ಇದರಿಂದ ಒಟ್ಟಾರೆ ಸಾವಿನ ಸಂಖ್ಯೆ 1,36,753ಕ್ಕೆ ತಲುಪಿದೆ.
ಪೋರ್ಚುಗಲ್‌ನಲ್ಲಿ ಮಂಗಳವಾರ 17,172 ಮಂದಿಗೆ ಸೋಂಕು ತಗುಲಿದೆ. ಗ್ರೀಸ್‌ನಲ್ಲಿ 21,657 ಕೇಸ್ ವರದಿಯಾಗಿವೆ. ಸಿಪ್ರಸ್‌ನಲ್ಲಿ ಕೂಡ ದಿನವೊಂದರ ಅತ್ಯಧಿಕ ಪ್ರಕರಣ ವರದಿಯಾಗಿದ್ದು, 2,241 ಮಂದಿಗೆ ಕೋವಿಡ್ ಹರಡಿದೆ. ಬ್ರಿಟನ್‌ನಲ್ಲಿ 1,17,093 ಪ್ರಕರಣಗಳು ವರದಿಯಾಗಿವೆ. ಕ್ರಿಸ್‌ಮಸ್ ಅವಧಿಯಲ್ಲಿನ ಒಟ್ಟಾರೆ ಯುರೋಪ್‌ನ ವರದಿಗಳು ಲಭ್ಯವಾಗಿಲ್ಲ.
ಪ್ಯಾರಿಸ್, ಲಂಡನ್ ಮತ್ತು ಬರ್ಲಿನ್ ಸೇರಿದಂತೆ ಕೆಲವು ಪ್ರಮುಖ ನಗರಗಳಲ್ಲಿ ಹೊಸ ವರ್ಷ ಆಚರಣೆಗಳನ್ನು ರದ್ದುಗೊಳಿಸಲಾಗಿದೆ. ಆದರೂ ಕೆಲವು ಸರ್ಕಾರಗಳು ರಾಷ್ಟ್ರವ್ಯಾಪಿ ನಿರ್ಬಂಧಗಳನ್ನು ಮತ್ತೆ ಜಾರಿಗೊಳಿಸಲು ಬಯಸುತ್ತಿಲ್ಲ.
ಫ್ರಾನ್ಸ್ ಮತ್ತು ಇಂಗ್ಲೆಂಡ್ ಅಧಿಕಾರಿಗಳು, ಜನರು ತಮ್ಮ ಸಾಮಾನ್ಯ ಜ್ಞಾನ ಬಳಸುವಂತೆ ಸಲಹೆ ನೀಡಿದ್ದಾರೆ. ಸ್ಪೇನ್ ರಾಜಧಾನಿ ಮ್ಯಾಡ್ರಿಡ್ ಸೋಂಕಿನ ಹಾವಳಿ ನಡುವೆಯೂ ಹೊಸ ವರ್ಷ ಸಂಭ್ರಮಾಚರಣೆ ನಡೆಸುವುದಾಗಿ ಹೇಳಿದೆ. ಇಟಲಿ ಎಲ್ಲ ಹೊರಾಂಗಣ ಕಾರ್ಯಕ್ರಮಗಳನ್ನು ನಿಷೇಧಿಸಿದೆ. ನೈಟ್ ಕ್ಲಬ್‌ಗಳನ್ನೂ ಮುಚ್ಚಲಾಗಿದೆ. ಆದರೆ ಖಾಸಗಿ ಸಮಾರಂಭಗಳಿಗೆ ನಿರ್ಬಂಧ ವಿಧಿಸಿಲ್ಲ.